Abú Media

Léiriúchán Bunaidh de chuid Abú Media. Is sraith mhór faisnéise staire seacht gcuid í seo, á hinsint ag Brendan Gleeson agus ina bhfuil athléirithe drámatúla de phríomhimeachtaí, a dhéanann iniúchadh ar shaolta an tseachtar fear a shínigh Forógra na Cásca 1916. Ba í seo an chéad mhórshraith teilifíse faoin Éirí Amach ó chomóradh caoga bliain 1966. Tá stádas finscéalaíoch bainte amach ag an seachtar sínitheoirí i miotaseolaíocht phoblachtach agus náisiúnach na hÉireann, ach is minic a bhíonn fíorscéalta a saoil agus na fíricí stairiúla ceilte faoi scáil na hagiagrafaíochta. Tá an Forógra ar cheann de na cáipéisí is iomráití i stair na hÉireann agus is achoimre cháiliúil é ar uaillmhianta poblachtacha agus náisiúnta na linne. Ach cé hiad na fir a dhréachtaigh agus a shínigh é, agus a shínigh a mbreithiúnas báis féin leis an ngníomh céanna? Ba iad Thomas J. Clarke, Seán Mac Diarmada, James Connolly, Pádraig Mac Piarais, Éamonn Ceannt, Tomás Mac Donncha agus Joseph Mary Plunkett iad. Téann an tsraith seo sa tóir ar na fir féin, ar a gcúlraí, ar a dteaghlaigh agus ar na heispéiris a mhúnlaigh iad. Bhí scéal ar leith ag gach duine acu, agus ba ghrúpa i bhfad níos éagsúla iad ná mar a shamhlaítear go minic. Bhí duine amháin faoi mhíchumas mar thoradh ar pholaimiailíteas agus é ocht mbliana is fiche d’aois. Cuntasóir agus píobaire den scoth ab ea duine eile, a sheinn don Phápa Pius X sa Róimh sa bhliain 1908. Chaith duine acu ocht mbliana ag ullmhú don tsagartacht, agus rugadh duine eile in Albain. Chaith Thomas J. Clarke cúig bliana déag i bpríosún Briotanach roimh 1900, agus ba mhac le tiarna talún rachmasach i mBaile Átha Cliath é Joseph Plunkett. Bhí Pádraig Mac Piarais, an duine ba cháiliúla acu, ina theoiriceoir oideachais, ina fhile, ina scríbhneoir gearrscéalta agus ina óráidí den scoth. Leanann an tsraith seo saol gach sínitheora agus fiosraíonn sí na cúinsí pearsanta agus na himeachtaí a threoraigh gach fear chuig Ard-Oifig an Phoist ar Luan Cásca 1916 – ceann de na chuimhneacháin ba thábhachtaí i stair na hÉireann sa fichiú haois. 7 × 60 nóiméad – Sraith Faisnéise Staire HD.