Abú Media

Cuireann Abú Media i láthair sraith chomhshaoil do dhaoine óga ina dtugtar deis do ghrúpaí páistí ar fud na tíre páirt a ghlacadh i bhfeachtais agus i dtionscadail a chuidíonn lenár lorg carbóin a laghdú. Faoi stiúir Aisling Ní Dhonnabháin, tugann an tsraith cuairt ar ghrúpa nua gach seachtain agus iad ag tabhairt faoi thionscadal a théann chun tairbhe don chomhshaol. Déantar iniúchadh ar fhaisean tapa, áit a n-athúsáideann grúpa drámaíochta cultacha dá léiriú féin, chomh maith le dúshlán truaillithe uisce a ghlacann club rámhaíochta orthu féin. Breathnaítear freisin ar chur amú bia, ar thruailliú uisce, ar bhithéagsúlacht agus ar go leor ábhar eile a bhaineann leis an gcomhshaol. Chomh maith leis na príomhthionscadail, cabhraíonn Jamie Ó Flannúra le beirt pháistí gach seachtain tionscadail shimplí athúsáide agus athchúrsála a dhéanamh sa bhaile. Ghlac páistí ó gach cearn d’Éirinn páirt sa tsraith agus chuidigh siad le feasacht a mhúscailt faoin gcomhshaol agus faoi laghdú ár lorg carbóin. “Ba shraith inspioráideach í seo le léiriú, agus ba mhór an spreagadh díograis agus cruthaitheacht na bpáistí a ghlac páirt inti a fheiceáil.” — Eileen Seoighe, Léiritheoir 7 × 24 nóiméad