Abú Media

Is sraith faisnéise uaillmhianach deich gclár í Saol Rúnda na gCrann, arna cur i láthair ag an scríbhneoir agus craoltóir Manchán Magan. Tá Éire ar cheann de na háiteanna is fearr ar domhan chun crainn a fhás, agus cuireann an tsraith seo i gcuimhne dúinn áilleacht agus luach ár gcoillte dúchasacha trí thuras fíor-shuntasach ó thaobh amhairc de. Díríonn an tsraith ar dtús ar chrainn agus ar choillearnacha dúchasacha na hÉireann, ach scrúdaíonn sí freisin na crainn nádúrthaithe agus choimhthíocha atá anois mar chuid dár dtírdhreach. Déantar iniúchadh ar an iliomad úsáidí a bhaineann le crainn, ar a ról lárnach i stair agus i mbéaloideas na hÉireann, agus ar an gcaoi a dtacaíonn siad leis an timthriall nádúrtha agus lenár saol laethúil. Rinneadh an tsraith a scannánú thar cheithre shéasúr i suíomhanna áille ar fud na tíre, lena n-áirítear Plandáil na Corónach agus Gairdíní Pháirc Chúirt i gContae Chill Mhantáin, Tullynally i gContae na hIarmhí, Caisleán Bhiorra i gContae Uíbh Fhailí, Páirc Náisiúnta Ghleann Bheatha i nDún na nGall agus Cill Mocheallóg i gContae Chill Mhantáin. Thug Manchán cuairt freisin ar na daracha seiseacha ársa i bPáirc Náisiúnta Chill Airne agus i nGleann Dá Loch, chomh maith leis an gcoill mhór de dharach peidincileach ag Caisleán Charleville gar do Thulach Mhór. Tá cuid de na crainn is iomráití in Éirinn le feiceáil sa tsraith, lena n-áirítear Darach an Rí i gCaisleán Charleville, an tIúr Éireannach cáiliúil i bhFlóranscourt, an tIúr mór i Mainistir Mhucrois agus an crann is airde in Éirinn – an Giúis Dhúghlais ar bhruach na Dairge i bPáirc Chúirt. Sa chéad chlár den tsraith dírítear ar an bPéine Albanach, ceann de thrí bhuaircíneach dúchasacha na hÉireann. Faighimid amach conas a d’imigh sí as Éirinn sa Mheánaois agus conas a tugadh ar ais í san ochtú haois déag. Tugann Manchán cuairt ar Phlandáil na Corónach i gCill Mhantáin, ar na péineanna cois locha i nGleann Bheatha agus i gConamara, ar fhoraois na mianadóirí i nGleann Dá Loch agus ar eiseamal den scoth i gCaisleán Bhiorra. I measc na saineolaithe a ghlacann páirt sa tsraith tá Donal Magner, Niall Mac Coitir, Aubrey Fennell, Dick Warner, Éanna Ní Lamhna agus Billy Mag Fhloinn. Casann Manchán freisin le cuid de lucht caomhnaithe na mbailiúchán crann is suntasaí in Éirinn, ina measc Thomas Pakenham, Brendan Parsons (Tiarna Rosse), Séamus O’Brien ó Chill Mocheallóg agus Dónal Ó Cnámhsí ó Pháirc Náisiúnta Ghleann Bheatha. Buaileann sé freisin le healaíontóirí agus ceardaithe ar spreag crainn a gcuid oibre, lena n-áirítear an t-ealaíontóir luibheolaíochta Grania Langrishe, a hiníon Atty Pollock, péintéir crann, agus an ciseánadóir Peter Beaumont. Is léiriúchán bunaidh de chuid Abú Media í an tsraith, curtha i láthair ag Manchán Magan agus scríofa agus stiúrtha ag Luke McManus. Treoir na gClár: An Phéine Albanach An Bheithe, An Chreathach agus An Leamhán An Darach Seiseach, An Caithne agus An Fhearnóg An tIúr An Darach Peidincileach An Coll agus an Crann Fiáin Úll An Fhuinseog agus An Sceach Gheal Stair Chrann agus Foraoiseachta na hÉireann Crainn Nádúrthaithe agus Choimhthíocha na hÉireann An Crann is Airde in Éirinn